Lajme nga sporti

Ronaldinjo: Do të shkoj në Pekin!
Futbollisti brazilian në radhët e Barcelonës, Ronaldinjo, ka pohuar se do të luajë në Lojërat Olimpike që mbahen muajin e ardhshëm në Pekin.
E enjte, 10 Korrik 2008 10:05
Pa marrë parasysh qëndrimin e drejtuesve të klubit katalanas, të cilët me çdo kusht po mundohen ta pengojnë atë për të udhëtuar drejt Kinës.

"Unë e shoh vetën duke luajtur në turneun olimpik në Pekin dhe besoj se do t'i sjellim Brazilit medaljen e artë", ka pohuar Ronaldinjo. Ai është përfshirë në mesin e 23 futbollistëve nga përzgjedhësi Karlos Dunga, të cilët do të luajnë në turneun olimpik, i cili nis më 6 dhe zgjat deri më 23 gusht. Ronaldinjo nuk ka luajtur që nga marsi për shkak të lëndimit dhe formës së dobët, kurse drejtuesit e Barcelonës kanë konfirmuar se janë të gatshëm ta shesin brazilianin, në rast se klubit i paraqitet një ofertë e mirë financiare. Disa prej klubeve evropiane kanë shprehur interesim për shërbimet e brazilianit, kurse ndër më të interesuara janë Milani dhe Mançester Siti






Barcelona shpërblen Messin me kontratë të re
Barcelona i ka premtuar sulmuesit argjentinas Lionel Messi një rritje të re të pagës, që është e katërta në katër vite.
E enjte, 10 Korrik 2008 09:49
Siç ka shkruar "La Nacion", drejtuesit e Barçës nuk dëshirojnë të rrezikojnë me të ardhmen e Messi dhe i kanë prezantuar atij një marrëveshje të re të vlefshme 7.5 milionë euro në vit.

Messi vazhdon të mbetet i lidhur me Barcelonën deri në vitin 2014 dhe marrëveshja e re përfshirin edhe një shumë prej afro 4 milionë eurosh si bonos në varësi nga paraqitja dhe sukseset.






Samir Nasri kompleton kalimin në Arsenal
Mesfushori i kombëtares franceze, Samir Nasri, ka kompletuar transferimin e tij në Emirates Stadium, pasi që dy klubet, Arsenal dhe Marseille, ka një kohë që kanë arritur marrëveshje për shumën e dëmshpërblimit.
E shtunë, 12 Korrik 2008 12:39
21-vjeçari Nasri, pas disa muajsh negociata, më në fund është lojtar i ri i Arsenalit. Shuma e transferimit nuk është publikuar, ndërsa Arsenali në faqen zyrtarë ka pohuar se ka nënshkruar marrëveshje shumëvjeçare.

"Jemi të kënaqur që angazhuam Nasrin. Ai është i ri, i shpejtë dhe një futbollist teknikisht i paparashikueshëm. Ai tregoi se ka një potencial të madh dhe mendoj se do të sjellë shumë kualitet në përbërjen tonë", ka thënë Wenger.

"Jam i lumtur që jam lojtar i Arsenalit dhe kjo ka shumë domethënie për mua. Është një hap i rëndësishëm i karrierës, pasi që Arsenali është një klub i madh. Do ta jap maksimumin për këtë klub", ka thënë Nasri.






Butragenjo: Kasilas e meriton "Topin e artë"
Ish-futbollisti i njohur i Real Madridit, Emilio Butragenjo e vlerëson portierin madrilen, Iker Kasilas, si kandidatin më serioz për të fituar çmimin prestigjioz "Topi i artë".
E premte, 11 Korrik 2008 14:46
Kasilas me paraqitjen e tij të mirë në portë ia mundësoi Realit që në dy edicionet e fundit ta fitojë titullin e kampionit në Spanjë, kurse gjatë kësaj vere e ndihmoi Spanjën ëër të fituar titullin e kampionit evropian.

Portieri i vetëm i cili e ka fituar "Topin e art" ka qenë portieri i BRSS-së, Lev Jashin, në vitin 1963. "Iker Kasilas është një portier i veçantë. Ai duhet ta fitojë 'Topin e artë'. Ai mbron në mënyrë konstante dhe e shpëtoi Realin shumë herë. Ai është portieri më i mirë në botë dhe me rastin e votimeve kjo duhet të mirret parasysh", ka pohuar Butragenjo, i cili për Realin ka luajtur nga viti 1983 deri në vitin 1995. "Kasilasi është kampion i Evropës. Ai ishte më i merituari që Spanja kaloi me sukses çerekfinalen ndaj Italisë. Paraqitja e tij në kombëtare ishte spektakulare", ka përfunduar Butregenjo







Kaka: Kristiano Ronaldo do të jetë futbollist i vitit
Futbollisti më i mirë i Milanit dhe fituesi i çmimit të vitit të kaluar për futbollist të vitit, braziliani Kaka, beson se këtë vit çmimi i futbollistit më të mirë të vitit do t'i takojë portugezit, Kristiano Ronaldo.
E hënë, 14 Korrik 2008 11:49
Futbollisti më i mirë i Milanit dhe fituesi i çmimit të vitit të kaluar për futbollist të vitit, braziliani Kaka, beson se këtë vit çmimi i futbollistit më të mirë të vitit do t'i takojë portugezit, Kristiano Ronaldo. Edicionin e kaluar Kaka e udhëhoqi Milanin deri te titulli i Ligës së Kampionëve, me një paraqitje të shkëlqyeshme dhe me 10 gola të shënuar.

"Favoriti më i madh për 'Topin e artë' pa dyshim sipas mendimit tim është Kristiano Ronaldo, për gjithçka që ka arritur me Mançester Junajtedin, me të cilën skuadër fitoi titullin e Ligës Premiere dhe të Ligës së Kampionëve", ka pohuar Kaka, i cili nuk do të marrë pjesë në Olimpiadën e Pekinit, pasi klubi kuqezi është shprehur kundër një udhëtimi të tillë. Kaka iu nënshtrua operimit të gjurit në maj të këtij viti, prandaj drejtuesit e Milanit nuk dëshirojnë që rrezikojnë për ta lejuar futbollistin të paraqitet në Pekin, pasi synojnë që në edicionin e ri ta kenë brazilianin plotësisht të gatshëm për sfidat e reja